fbpx

Faauma leTautua a le SamoaTimes

O le masani a le atunuu i ana po ula, e iai lava le taualuga. O le saasaaga mulimuli e faamae’a ai pisaga o le po. O ā lava aga o le saasaaga mulimuli e tasi lava lona anava o le faamae’aga. E manatu foi le Faatonu, o le lomiga lenei a le Samoa Times, o le taualuga. O le faamae’aina o le tautua a le Samoa Times, ona taai lea o le fala seesee ma sulu le foe seia iai se taeao oi luma e atofa e le Atua e toe faaauau ai lana tautua, pe afai o lona finagalo lea. Ua 19 tausaga o tautua le Samoa Times i le atunuu.

O se tautua sa faia ma le loto atoa, o le tautua sa faia ma le loto finau, ae o le tautua foi sa fai ma le faaeteete, e faigata o Samoa o le atunuu e maitau. Ua fai i lagi le folauga a nisi o tamalii sa o latou asaina le gasū o le taeao i le malaga sopo a le Samoa Times, e pei o le tofa ia Niumaana Lavea. E manatua foi le susuga i le Faafeagaiga ia Peter Leota, o le susuga ia Papalii Lafulafu Peo, Manuava’ia Iese Vaoga, le faletua ia Miriama Alaalatoa-Pomare, aemaise le Susuga ia Afoa Seti Afoa. O nisi nei o tamalii o le atunuu sa aloina le foe tata taumua o le sa o le Samoa Times i tausaga ua mavae. E lē faagaloina le faletua ia Manulelei Coe, o loo galue pea e oo mai i le taimi nei, ua loa tausaga o lana tautua lē faatuaoia, o se tautua ua afu ae o se tautua foi sa fai ma le papale.

O lea ua faatili foe mo le a’e ae o loo galue pea Manulelei Coe mo le Samoa Times. Malo le tautua. E manatua foi le susuga ia Iwan Sugiharto ma le Susuga ia Charles Palesoo, o loo galulue pea i vaiaso taitasi i le tuufaatasiga o le tatou lomiga. O nei tautua uma ua faamae’a ma ua taualuga, ae o le a lē galo. O le manulauti a le Samoa Times o le momoli atu o tala i vaiaso taitasi auā lou silafia. O se galuega sa fai ma le onosai, o se tiute e lē faatuaoia ona taimi galue, o se matafaioi e mafai ona faapea atu, e gase ai le tino ma le mafaufau, seanoa le filigā ma le lototele, e lē maua ni fua lelei o lenei galuega. E momoli ai la’u faamalo ia i latou uma sa galulue o ni Tusitala mo le Samoa Times i le tele o tausaga. Ae faapitoa mo i latou o loo galulue pea i le taimi nei.

Le tofa ia Afoa Seti Afoa, Sioeli Alofaifo, Leilua Ame Sene ma Maina Vai. O le tofa ia Tiatia Failautusi Tiatia, Asiata Pio Vaoliko, Leilua Jerry Uesele faapea le faletua ia Rosa Tamara Fiu. O se tasi o vaega tāua o lomiga i vaiaso taitasi, o le sao tāua o Itulau masani e pei o le Itulau “O oe ma le Tulafono” na saunia e le tamaitai Loia ia Leuluaialii Olinda Woodroffe; le Itulau “Ia Toe Matimati Lau Aganuu” na saunia e le Tofa Lofipo Siamoa Taputu Niuafolau Sineva Peilua; le Itulau “Tausi Tusi” na saunia e le tamaitai Su’etusi ia Semau Faamau Levi; le Itulau “O le Malamalama” na saunia e le Faafeagaiga, Susuga Poni Fonoti; le Itulau “Oe ma Upufai o Malo” na saunia e le Susuga Lauano Ati Ilaoa; le Itulau “O le Tali o loo i Taitai o le Lumanai” na saunia e le alii Minisita, le Afioga Aupito Tofae, Toeolesulusulu Su’a William Sio; le Itulau “Fai atu ai foi” na saunia e le Tofa Sooalo Setu Mua, le tautua a le Sooatulau na saunia e le Tofa Leautuliilagi Taotua Maletā Faasapisapi Sauvao, faapea le Itulau Faapitoa mo Aoga ma le Paso na saunia e le Susuga ia Levi Tavita.

O le tuufaatasiga o nei tomai e tele, e tele le sosia ma le tamaoaiga o le silafia ma le iloa sa faasoa atu ma mautufaaga ai Samoa uma sa faitau i le Samoa Times i vaiaso taitasi. Tatou te mitamita i se galuega na lelei ona fai, ma o tatou faasifo i luma o le Atua ma faapea ane, o tatou o ni auauna lē aogā. Ina ne’i tau mamate faamea ta’ita’i le mafuaaga o le faamuta o le tautua a le Samoa Times mo lenei taimi. Samoa e lē o toe po malae i aafiaga o le lalolagi atoa ona o le Koviti-19. E lē faatusalia aafiaga o le soifua o tagata, i aafiaga o pisinisi ma le tamaoaiga o atunuu uma o le lalolagi ona o le matautia o lenei faama’i.

Ona o le aafiaga o tupe maua ona o le Kovati-19, ua faigata ai foi ona faaauau le tautua a le Samoa Times mo lenei vaitaimi, peitai, e iai le faamoemoe a tusa ma le finagalo o le Alii, e ono toe iai se isi laolao talafeagai, e toe lalaga ai le tautua a le Samoa Times auā oe Samoa le atunuu pele. O le faamalo faapitoa e ave i le Susuga i le Faafeagaiga ia Lui Ponifasio faapea le faletua ia Ane, o tautai o le gataifale sa taualoina le fita o le vasa i le amataina o le tautua a le Samoa Multimedia e pei ona iai le Samoa Times, Radio Samoa ma le Moana TV. O le Samoa Times sa faafailele i aao o le Faafegaiga ma le Faletua e pei o se pepe sa tausi ma alolofa i ai ina ia ola ma malosi. E lē faigofie ona faamuta lea alofa auā o le afu liligi ma le galuega sa fai ma le loto atoa.

E ui o loo faaauau pea le tautua a le Radio Samoa ma le Moana TV, ae o le a lē atoa le vaai i le auaiga o le Samoa Multimedia Group (SMG) ina ua mālōlō le Samoa Times. Peitai, o le 19 tausaga o le tautua a le Samoa Times o se taimi umi, ua lava foi lona sao mo Samoa. Ae a faasifo le lotomalie ona atuē lea ma momoli le faamalo i le Faafeagaiga ma le Faletua ona o le maelega. Avea ai foi lenei avanoa e fai ai a’u ma sui o le Pulega ma le Aufaigaluega a le Samoa Times, e momoli atu ai vaimalu i pu’ega, i se sasi ma se faaletonu o le tautua ma le auaunaga a le Samoa Times i nei tausaga e tele.

O upu a le atunuu, e ma’ema’e le tautai e sese lava lana atu i ama. Ae manatua ai le sega a le Tuimanu’a fai mai a oo ina ifo le fui sega e talai lava e le sega ona noataga. Faamolemole Samoa faamagalo ni lape o le tautua a le Samoa Times. Ia tatala e lou finagalo faatamalii, se aleu o le tautua a ‘au nei o le Faatonu faapea le Aufaigaluega atoa a le Samoa Times. O la’u saafi ia aumai e le Atua le laolao e toe faalele ai le fu’a a le Samoa Times ua lausilafia ai ia Samoa ma le atulaulau. Alofaaga mo oe le atunuu pele,

Tanupo Fiu Fogalevai Lemalu Aukuso Samoa Times.

Ua silimea le seuga i le tautua a le Samoa Times

Tusia: Papalii Lafulafu Peo – Aukilani
O le upu ua masani ai Samoa o le aso ma le filiga o le aso foi ma le mataigatila. A oo foi ina fotu le fuata ulu ona ta lea ma fafau lou e afua ai le fuaitau, o le lou ma lona fuata. Ae o le tala a le Failauga, e iai lava le tau o mea uma. I se isi faaupuga, e soifua mai lava le tagata ua uma ona tuumatamaga e le Atua le vaevaeina o le soifua tautua ma le agai i luma o le olaga e fua i le vaitau ma mea e tutupu mai ai.

E faapena le tautua matavela ma le auaunaga a le nusipepa o le Samoa Times, o le nusipepa e lē toe tau faailoina lona sao mo Samoa ma le mamalu o le atunuu, o ē sa fiafia e faatau ma faitau le Samoa Times i vaiaso taitasi talu ona amata mai lana tautua. O le tausaga e 2001 sa faavaeina mai ai le nusipepa o le Samoa Times, o se moemitiga sa faapea ona faatofalai i ai le Susuga i le Faafeagaiga ia Lui Ponifasio ma lona Faletua ia Ane. O le manulauti o le fia faalauteleina lava lea o le auaunaga auā Samoa ma lona silafia i tulaga tau faasalalauga, ma sa vaavaalua mai ai ma le Radio Samoa 1953AM, o le uluai faalepo lea a le Susuga Lui ma le Faletua ia Ane sa tautua mai ai Samoa, lea sa amataina i le tausaga 1999 e oo mai nei lava ma ua silia ma le 20 tausaga. A fua atu la i lea vaitau, ua tusa nei ma le 19 tausaga le matua o le tautua a le Samoa Times, ma o lea foi ua faamae’aina ai.

Sa lei faigofie le amataina mai o le nusipepa a le Samoa Times e tusa ai ma le saunoaga a le Susuga i le Faafeagaiga ia Lui Ponifasio, ona sa amata toatasi mai lava na’o ia lenei galuega tele i lona talitonuga o se vaaiga mamao sa faailoa mai e le Atua ina ia faia. Na’o si ona Faletua sa la galulue ma fesoasoani ia te ia a’o tau sailia se aufaigaluega i lena foi vaitau o le tau amataga mai o le pepa. E peiseai o uluai lu’itau ia sa faafeagai ma le tau afuafuaina mai o le pepa, peitai sa lei tuulafoaiina lava e le Atua moemitiga ma na iu lava ina faamanuia mai le Alii ma tatala avanoa, seia oo atu lava ina maua i latou e galulue tumau ma faaseesee mālie mai ai loa ma le Samoa Times i nei tausaga e tele o lana
auaunaga.

O se tasi o itu sa lei faigofie ai le taumafaiga mai o le pepa, ona e fai lava si tele o nusipepa Samoa sa iai i lea foi vaitaimi, e pei o le nusipepa a le Samoana, Samoa Post, Le Manumea Samoa, Tautua Samoa, Puletini Samoa, Samoa Observer ma isi. O nusipepa uma nei sa tautuaina le mamalu o le atunuu i totonu o Aukilani nei ma Niu Sila atoa, ma sa faapea foi ona auina atu a latou kopi i Samoa. E ui i le fou mai o le Samoa Times, peitai sa lei umi lava se taimi ae faapea loa ona siitia lona tulaga lelei ma faavae ai se sootaga vavalalata ma le mamalu o Samoa i totonu o Aukilani ma isi itu o Niu Sila.

E lei leva lava ae amata loa ona auina atu le nusipepa i Ausetalia, ma o se tali lea o matatia sa ausia vave ina ua amataina le Samoa Times. Sa saoasaoa lava le salalau atu o le pepa i Setete taitasi o Ausetalia, ma faigofie ai foi ona maua fesootaiga ma le mamalu o Samoa o loo alaala ma papaaao i lea foi Konitineta. Sa uigaese lava le tulai mai o le Samoa Times i le tulaga sa faatinoina ai le tuufaatasia o lana tautua, e fai o le lelei o le vaevaeina o tala i itulau taitasi, ae faapea ai foi ma le manino lelei o ata i le silasila a le aufaitau. O se tasi o itu na mataina ai le tautua a le Samoa Times, o le tele lea o ona itulau masani, o itulau ia o loo faasoa mai ai tomai ma agavaa a i latou sa tusiaina, e pei o tusitusiga i mataupu tau i aoaoga, o tulaga tau i le tulafono, o le itulau o le aganuu, o faamatalaga mai le Palemene o le Malo o Niu Sila lea sa faapea ona tusia e le afioga i le Minisita o Tagata Atumotu i Niu Sila nei, le afioga Aupito Tofae Toeolesulusulu Su’a William Sio. Sa faapea foi ona fiafia tele tagata e faatau le Samoa Times ona o le tele o tala ma lipoti tuusa’o mai i Samoa i vaiaso taitasi, e ala i le aufaigaluega tusitusi a le pepa i Samoa.

O lona uiga, o le pepa o le Samoa Times sa atoa uma i ai le tele o vaega e moomia e le tagata faitau, e oo lava i pisinisi sa faapea ona faasalalauina ai, o pisinisi lava e moomia e nai o tatou tagata auā manaoga o aso faisoo. Sa ta’ua e le Susuga Lui Ponifasio, na amata mai lava le tautua a le Samoa Times i le maualuga o le tulaga lelei i soo se vaega o lana auaunaga, ma o le tulaga lava lena na taumafai ai lava le Pulega ma le aufaigaluega ina ia faaauau ai e oo mai lava i le vaiaso lenei ua fuafua o le a faamutaina ana galuega fai. O le pine faamau o lea manatu, talu lava ona uluai amata mai le lomiga muamua a le Samoa Times, e tasi lava le fale lolomitusi sa faaaogāina e lolomi ai kopi o le pepa i vaiaso uma, o le kamupani a le Horton Media i East Tamaki, e oo mai lava i le taimi nei.

E ui ina sa amata ona lolomi mai o taugofie, faasolo atu ai lava ina sii i luga le totogi o le fale lolomitusi, peitai e lei suia ai lava ona o le manatu ina ia lelei ma maualuga le tulaga matagofie o le pepa i le taimi e uma ai ona lolomi ma taulimaina kopi auā le tufaina atu i faleoloa masani mo le mamalu o Samoa i aiga ma ana paaga. Sa lauiloa lava le Samoa Times ona e na’o le pau lea o le nusipepa sa telē lona sao mo le mamalu o le atunuu i tulaga tau faamanuiaga tau tupe ma isi lava vaega lelei e aogā mo le soifuaga. E tele tausaga sa faia ai ni taaloga ma tuu atu ai le avanoa i le aufaitau e tali atu ai ni fesili, ma sa saunia lelei faamanuiaga tau seleni, o televise ma pusaaisa, atoa ai faatauga sa faapea ona fai ma faailoga i le aufaitau. Na o le pau foi lea o le pepa Samoa i Niu Sila nei sa o latou tuufaatasia se aiga tele lava i le tausaga 2004, lea e silia ma le 200 tamā sa auai o se tapenaga sa faia faapitoa lava e le Samoa Times auā le Aso Sa o tamā.

E lē galo i le toatele o tamā lea aso, auā sa fiu e tali le manuia i tulaga tau meaai, o meaalofa tupe ma faailgoa eseese, ae salani i le alu o le tama ma ave lana mitiafu sa lolomi faapitoza lava e le Samoa Times mo le latou Aso Sa faapitoa. Sa iloga lava le auaunaga a le Samoa Times i le lolomiina lea o tala i mea tutupu ma faasalalau atu nisi o mataupu i le lotoifale ma le siosiomaga faasamoa, e ui ina e lei silafia uma e le toatele (breaking news). O se faalavelave faatoa tupu, e muamua lava lomia e le Samoa Times. O faafitauli i totonu o Ekalesia eseese ma tulaga e va ai le fogavaa, e te’i lava nai ekalesia ua alu atu i le Samoa Times nai a latou mumugaveve ae leiloa poo ai na liki mai ai i tua faamatalaga e uiga i nai a latou foi vesiga. E oo lava i Matagaluega a le Malo ma le Kapeneta ma le Palemene, e ofo pe faapefea ona faasalalau atu e le Samoa Times nisi o a latou fuafuaga e lē o faalauiloaina, ae o lea ua alu atu i lomiga a le Samoa Times.

O se tasi lea o itu na tele ai lava ina tulimatai e tagata le aso e alu atu ai i tua pepa, auā latou te fia iloa nei mau mea auā e fou i le latou silafia. E manatua pea le Samoa Times i taimi o faigapalota a le atunuu, talu ona amata mai le Samoa Times, a oo loa i faigapalota, e lolomi uma lava i le pepa ma faalauiloa atu auā le silafia e tagata uma ata o sui e manumalo mai i itumalo faaalalafaga, e oo lava i ē filifilia e avea ma Minisita, e tusa lava pe faatoa faalauiloa mai nei ae toe o ni nai itula lolomi le pepa, e pei lava o le emo o le mata le galulue o le aufaigaluega ina ia mautinoa e silasila Samoa i ata o latou sui ua filifilia mai i itumalo taitasi. O se tasi o masani faifai pea a le Samoa Times o le tuufaatasia lea o lomiga faapitoa i aso faatulagaina o le Malo, e pei o le Teuila, ma le Sisigafua.

Faatoa iloa lea ua lē mafai ona faataunuuina lea auaunaga mo lenei Sisigafua ona ua leai se polokalame o le faamanatuina o le tutoatasi o le tatou Malo talu ai aafiaga o le faama’i e pei ona feagai nei ma le lalolagi. Ae o le tele o tausaga ua tuanai, e lē sasi le tautua a le Samoa Times i le aumaia lea o nei faamoemoega uma auā le atunuu ina ia faamalieina lana faitau ma le maimoa i ata uma o nei sauniga faatulagaina. O le lomiga mulimuli lenei a le Samoa Times ona malolo lea o lana tautua seia iai se taimi oi luma pe a talafeagai ma fuafuaga e ono toe faaauau ai lana auaunaga ua lausilafia ai.

SAMOA TIMES  –  2 JUNE 2020